Le historia de interlingua comprehende le formation del lingua ipse e etiam su communitate de parlatores.
Le prime credito pro interlingua debe ir al herede american Alice Vanderbilt Morris (1874โ1950), qui deveniva interessate in linguistica e le movimento de linguas auxiliar international in le comenciamentos del 1920s. In 1924, Morris e su sponso, Dave Hennen Morris, establiva le International Auxiliary Language Association (IALA) (Association de Linguas Auxiliar International), association sin proposito de lucro, in New York. Lor objectivo esseva placiar le studio de linguas auxiliar in un base scientific.[1]
Le investigationes del problema del lingua auxiliar esseva in progresso al Consilio International de Recerca (International Research Council), le Consilio America in Education (American Council on Education), le Consilio American de Societates Docte (American Council of Learned Societies), le associationes britannic, francese, italian e american pro le avantiamento del scientia, e altere gruppos de specialistas. Morris creava IALA como un continuation de su labor..[2] Illa disveloppava le programma de recerca in consultation con Edward Sapir, William Edward Collinson, e Otto Jespersen.[1]